'A Papessa

Ce credevemo ch’era ‘o Papa,
ha cacciato fore ‘a fessa.
Obbilloco è la Papessa.

Mentre ‘o steveno traspurtanno
mmiezzo ‘a folla ha parturito
Stiso ncopp’alla lettica.
Tra nu Ave e Gloriappatre,
lu criaturo presto è ascito.
Tra la puzza dello ncienzo
ha cacciato lu vagito.
Tra il rummore delli canti
tutti quanti hanno sentito.
Lu biancore delli vesti
mano man si è imporporito
e la gente che lo ha visto
l’ha indicato presto a dito.
Per le doglie dellu parto
il suo viso è scolorito,
per la puzza dello ‘ncienzo
ha perduto ‘a cunuscenza.
Presto è detto e presto è fatto.
E che stammo cchiù aspettanno?
Le sulleveno li panni
va ‘a vede ca sotto a veste
è Giovanna e no Giuvanne.

Ce credevemo ch’era ‘o Papa.
Ha cacciato fore ‘a fessa.
Obbilloco è la Papessa.

'O purtavene 'mprucessione,
bell’e bbuono è sciuto ‘o sanghe.
Mamma mia che impressione!
C’è chi sta scandalizzato
pu lu Papa c’ha sgravato.
Pe la Chiesa è na vergogna
sta schifezza ca mo è nato,
certamente è l’Anticristo
ed è frutto del peccato.
“Abbassate li tendine!”
E annascusa nu prelato
saglie dint’’o baldacchino.
Presto è detto e presto è fatto.
“E che stongo cchiù aspettanno?
Per la Chiesa è na vergogna
famme libberà ‘e sta rogna.”
Le sulleva priesto ‘e panni
e a ‘o criaturo ca mo è nato
mo l’appoia doie dete ‘nganno.
E strignenno forte forte
cu lu sdegno va mprecanno:
“Ah mannaggia a chi t’è muorto,
va all’Inferno addò si asciuto!”
E pecchè po è n’ommo accorto,
‘o velliculo l’ha sciugliuto.
E per essere cchiù sicuro
ca nun ha fatto ‘o viaggio a vuoto,
dint’’o core d’’o criaturo
ci ha nfilato nu spillone
proprio mmiezzo a prucessione.
Tra nu Ave e Gloriappatre
tutt’’o sanghe l’ha schizzato
e siccome è n’ommo accorto
pe nun fa spurcà ‘e tendine
se mette isso annanze ‘o muorto
ca comme a fonte ca zampilla
ha nchiavecato ‘o baldacchino.
L’ha arridotto nu mastrillo!
E la veste tutta ianca
ca teneva lu prelato
tutta rossa è addeventata.
E siccome è n’ommo accorto
curaggiuso e forte assaie
ca ha affruntato l’Anticristo…
…e la veste non gli manca
anzi già la tiene indosso,
e ha scacciato via il male…
…senza indugio lì sul campo…
(pausa)
L’han promosso cardinale!

Ce credevemo ch’era ‘o Papa.
Ha cacciato fore ‘a fessa.
Obbilloco è la Papessa.


Giuseppe De Chiara