'O diavulillo

A siconne ‘e do’ me vide
me daie ‘o nomme ‘e chi t’è bive.
‘A siconne ‘e do’ te porto
me daie ‘o nomme ‘e chi t’è morto.
Si sto ccà ‘ncopp’a stu munno
o si invece sto ‘o sprufunno.
Si me truove int’allu sacco,
oi Nì, so Parasacco.
Si me truove int’’e tiane,
oi Nì, so lu Diantane.
Si t’apparo dint’all’inverno
oi Nì, so lu Zifierno.
E si rido a schiattariello
so semp’i Mazzamauriello.
Si te faccio li moine
comm’a femmena cianciosa
ca se move sinuosa
e te fa vedè la Rosa
tutta quanta a serpentiello
e se ‘ntosta ‘o strumentiello,
so semp’ì lu Farfariello.
Si te faccio li corvette,
so semp’ì lu Diavuletto.
Cu la luce d’’e cannele,
so semp’ì, lu ‘Ntrallazzere.
Quanno invece staie ‘ncazzuso
ca vuò scassà ogni cosa
e faie tutt’’o cazzemmuso
c’arrevuote, vatte e strille,
so semp’ì, lu Diavulillo,
ca te fa sentì sta forza
dint’’o sanghe e dint’all’ossa,
ca te fa sentì guappo,
omme de consegna e ciappa.
Si può ribbaltà lu munno
è perché sei mio aulunno.

Mamma mia che paura,
chi sa do’ i m’annasconno?
Ca tu voglia o tu non voglia
i te porto int’’o sprufonno.

Quanno a tavula t’assiette
e p’’a famme nun si cchiù bbuono
‘e guardà ‘nfaccia a nisciuno
e pe dint’’o cannarone
t’annurcasse ‘nu cristiano
e pe fa st’evacuazione
si nun te vuò rompere ‘o culo
caccia mo nu bellu rutto
ca a cacà ‘n’essere umano,
oi Nì, so cazze amare.
Ma si può fa tutto chesto
è pecchè si addeventato
la mia prole e i te so pate
e da me hai ereditato
tutti chisti belli diente,
arricuordete ca io
songo l’Uorco dell’Infierno.

Mamma mia che paura,
chi sa do’ i m’annasconno?
Ca tu voglia o tu non voglia
i te porto int’’o sprufonno.

Giuseppe De Chiara